सोसनी सुपनां री
आधी जातरा
भूंडा चितरामां री
दिखावणी में ई पूरी हुयगी
न जाणै क्यूं
सूरज री गूगळी किरणां
बोछरड़ाई सूं छाजां सूं झुरै
हिरमची सिंझ्या रे खुंणै
कोई काजळ रा साथ्या माडै
का वो सूरज
आंधा कुवा नैं कई बार मुंडौ दिखायग्यौ
आज तांई म्हारौ अहम
कांकड़ रे फोगला सो
अणछांग्यौ ई है।
आखी रात
नाड्यां में डेडरा
सूंनेड री फड़ बांचै
सुधरा भोपा
मन रे रावणहत्थे पर
दरद भर्या गीत अलापै।
म्हूं—
आगम री
बड़कणी डाळी सूं
हाकां धाकां
दिन रा दाझैड़ा पान
सुवडूं हूं
मांनखै रा हाथ पग
निरदै जेज छांग नांख्या
चोरंगौ मांनखौ
बैसकै पड़यौड़ी जिनगानी नैं
उठा नीं सकै
कोरी टिचकारी दे सकै है
अब न हथेळयां में
आंटण जनमसी
न पगां मांय फाला फळसी
न पींडियां में धूजणी हुसी
बूकियां रो सत!
बूकिया हुयां निसरसी’क
चोरंगा मांनखै रै कीं नीं
पण मांनखै रो के दोम
आखी जिनगानी ई चोरंगी है
सै कप प्लेटां में रितग्या
सै गळियां चौरावां सूं सैंदी हुयगी
पण आज तांईं भी
आ बात गाडोल्यां चालै
जुग री खूंटी
मिनख पणै रो हार निगळगी
इण सारूं चौरंगी जिनगानी
सूनैड़ री चूंतरी पर बैठी
दरद रा गीत उगैरे
कुण जाणै कितरा दिन
थे म्हारी आस्था नैं
मिन्दर रा पगोथियां सूं
भगाता रहस्यौ
पसीनौ पूछबाळा हाथ
कांवळां री चूं चां’र
काळा सूरज रा फण नैं
झाला देवै
चौरंगी जिनगानी रा
उदास कोयां में थड़ी करता
सुपनां रो के होसी
कुण जाणै?
