Anjas

संस्थापक : परिचय

संजीव सराफ़ पॉलिप्लेक्स कार्पोरेशन लि. रा संस्थापक, अध्यक्ष अर मुख्य अंशधारक है। ओ कार्पोरेशन दुनिया मांय पी.ई.टी फ़िल्मा बणावण वाळी सबसूं मोटी कम्पनियाँ मांय सामिल है।

श्री संजीव सराफ़ री सुरुआती भणाई सिंधिया स्कूल मांय हुई अर उणरै बाद आई.आई.टी. खड़गपुर सूं सन् 1980 मांय ग्रेजुएशन करी। तापछै उणां ओडिशा मांय आपरो पुस्तैनी कारोबार संभाळ्यो अर पॉलिप्लेक्स रै रूप मांय औद्योगिक जगत मांय आपरी विसिस्ट पिछाण बणाई। इण कंपनी री पिछाण वां सिफारिसी मोल रै आधार माथै बणाई जिणरी औद्योगिक जगत मांय अंजसजोग प्रसंसा हुई। पॉलीप्लेक्स भारत अर थाईलैंड री अेक पंजीकृत कंपनी है।

श्री सराफ़ ब्यौपार रै दूजां खेतरां मांय भी ठावी जिग्यां बणाई है। वां क़ानूनी सूचना उपलब्ध करवाण वाळी ‘मनुपुत्र’ नांव री वेबसाइट भी बणाई है। पर्यावरण सूं गै’रा सरोकारां रै कारण वां अक्षय ऊर्जा रै खेतर मांय भी निवेश करयो जिण रै पाण पंजाब, उत्तराखंड अर सिक्किम मांय पन-बिजळी प्रोजेक्ट थरपीज्या। वै अनेक कंपनियाँ रै बोर्ड रा सक्रीय सदस्य भी है।

श्री सराफ़ उदार अर मानवतावादी मिनख है जिका कंपनी री लोकहितकारी गतिविधियां मांय भी रूचि राखै है। इण गतिविधियां रै मांयनै अेक चैरिटेबल स्कूल भी चाल रह्यौ है जिण मांय 1200 टाबर भणाई कर रैया है। श्री सराफ़ नै पढ़वा री घणी लालसा रैवै है। वांरौ उर्दू सायरी सूं गै'रौ लगाव है अर वां उर्दू लिपि भी सीखी है। वां रो चित्रकला अर संगीत सूं ई गैरौ परेम है।