मैं दिन रा सूनी ओळ्यां पर
सबदां र गड़पोथ्यां चढेड़ा
बांझ अरथां री टीपणी मांडूं
अर नितकी
छाजां सूं उतरती सैंदी
एक धोबो तावड़ी देखूं
रात नूवां पोमचा सी सामट’र मेलद्यूं
सुध री निथरेड़ी सिझ्यावां रा पींदा रो
कादो कुचरूं
नूवी गळ्यां सूं ओळखीजूं
नितकी
तर तर बधतो सूनो पण
उदासी री छीयां में
मन हीणों मैं
म्हारी थाक्या पगां री
अंत बिहूण जातरा में बरसां सूं
भूंडा चितरामां री दिखावणी में
मांयली तरेडां री बराबरी हेरुं
अठे कीं नूंवो नी
ओ सो को सो सैंदो-सैंदो लागै
तूटेड़ा गिलास री तीखी चूंचा
ऊंदी आलपिनां रो मेळो
अर सूनेड़ रो पसराव
अठे सो की बोई है—
बस म्हारो बागी व्यक्तित्व
छांट-सो
कई बेडोळा संदर्भां में बिखरग्यो
अर मैं इण बेडोल हाल मांय जीवूं
कोर्ट में कूड़ी गुवाई द्यूं
अर मिन्नर री ध्यावना करुं
कलम उठावूं अर
संघर्ष री नगरी में सोर्टकट हेरूं
आ सुणू हूं’क
लोग म्हारी तिकड़म नै
साधना कैवै
अर कैवै—म्हानै भी साथ लै
म्है भी जातरा करस्यां
मैं आंनै कियां कैवूं’क
म्हारो विस्वास मत करो
मैं साव अंग बिहूण जातरी हूं
पण अतरी नागड़ी सांच
चौरावा में ल्या’र कियां मेलूं
खारी बात कुण सुणै?
कई गळ्यां मनै साव अणसैंदी लागै
म्हारी ओळखाण
नानी टींगरी-सी गुमनी
सोचू हूं—
क ओ मिनख रो खोळियो उतार द्यूं
अर सै'ने थाम-थाम’र कैवूं—
क मैं बन-माणस हूं
थे मनै मिनख मत समझो
पण कुण मानै
मैं कांई सबूत द्यूं
क मैं मिनख कोनी
क तो अभूतपूर्व जिनावर हूं
क भूतपूर्व मिनख
इण जातरा में—
सै सबदां रै तकियां री खोळ्यां बदलीजगी
सै अरथां रा उणियारा बदळग्या
अब मिनख नै मिनख हुवारी
सबूत देणौ पड़ै
अर आस्था रा पगोतियां सूं
तिसळता पगां नै
सूळां री भासा भणावणी पड़ै
थाक्या पगां सूं
भूंडा बेडोळ चितरामा री
अंत बिहूण जातरा में
बारली धूणी सूं
सूनेड़ गिटती जेज रा
उमीजेड़ा गळा में
कविता रो खरास घुळै
विदरो सागै चालै...
