कुण पूछै आथमतै सुरजी रै– चढ़ती बुखार नै
अणभाई हंसी रो हाकौ फूटै,
नी सुणै खूंवों उचकातो बगत
तेंदर री रमझोळ
दिन उगै अर आंथणै,
पण कद ताईं
अंधारो ओढ्योड़ी कोटड़्यां में
हथाई रा सामेळा जुड़ैला?
कीं पग ढाबो
रपटण री काया मत भांडो।
हैं रे भाई!
कद ताईं गलपोट्यां मसूंबा लाद्यां
बिणजारा सो बिणज करोला?
बस बैठ्या रैवोला
क्यूंकै स्यात सांच रै ब्यावण री टेम हुवै
भाटै रै दांत उगै
माटी री नसां उथळीजै।
भाट्टड़ा
धड़को मत खावो
थोथा खंकारा री सरम सूं
आं कन्नै फगत खंकारा है
डरो मत
मरदानगी रा ताबीजां सूं
कीं सावळ सोचो
सरीर सूं उपड़तै तेज नै
खूंट्यां माथै मत टांगो!
हैं रै गैला..
कद ताईं माथै पड़तै आभै नै रोकोला?
साळ रा किंवाड़ जड़्या मत बैठो,
कूं-कूं लाग्योड़ा सपना री
संकळाई मत तोड़ो,
थांरै बूक्यां रै मांय
समदर झिकोळा खावै।
थांरी एड्यां सूं
केई जणां रै मंगरा में दरद हुवै,
पण कीं संकळप ल्यो–
आकड़ै री डोडी सूं
कद अवतारी मिनख जलम्यां?
खैर साथीड़ा।
सिर कट्यां पछै भी लड़ो।
ईं बांझ धरती रा बेटा बणो।
छोडो नी घूरसाळ रो बासो
कद ताईं चमगूंगा बणौला?
थांनै कोई नी जगावै
सुरजी रो लाल मूंडो जगासी।
