कदै धूळ उडावती गळियां अबै
गायां रा खुर तोड़ती सी.सी. सड़कां है
गोधूळी वेळा मांय उडती धूळ सूं
सौरमीजी सिंझ्यां रो दरसाव
रैयग्यो फगत फोटुवां मांय
धोळी दोफारी सूं लेयनै
आधी रात ताणी
गांव रै मोट्यारां सूं लद्या रैवता पीपळ
कै तो कटग्या
कै ठाडां रै कुहाड़ै सूं डरनै
कर लीन्हो आपघात
तीज-तिंवार उभकली देवतो
वो वाटर वर्क्स रो बडाळ नीम तो
कद ई चढ लीन्हो पाणी देवणियां री नीत रै धक्कै।
फगत वरदी ई नीं बदळी है
सरकारी स्कूल रै टाबरां री
उण रा सै ढंग-ढाळा न्यारा है
वै पैलड़ी कुचरण्यां
नीं है अबै उणरै सिलेबस मांय,
स्कूल मांय घणा ई
चिणीजग्या अबै कमरा
चौफेरूं भींता ई इत्ती है
कै क्लास मांय जंगळै कनै बैठनै ई
नीं हुय सकै गळी रो नजारो
छापां मांय खूब है
जमेड़ै पाणी रा चितराम पण
वा धूणी सूनी है जठै
भाखपाट्यै च्यार बजै आयनै
छाणा सिलगावता हा किसन बरड़
अर अेक-अेक करनै
भेळा हुय जावता हा
घरां सूं आयनै तीरथ
कदै-कदै दीख ज्यावै
गांव मांय कोई डैण ई
पण किणी लंगोटियै नै देखनै
नीं बापरै उणरी आंख्यां मांय
अबै कोई चिलक
किणी सागड़दी रै बाप
कै लुगाई सूं जुड़ी मसखरी अबै
बीत्यै बगत री बात है!
होळी-धोरै जावती भीड़ मांय
गिणती तो कमती-बेसी करनै
वा ई है,
ढप अर चंग ई है
पण पछै ई किणी जनाजै
अर इण उछबां मांय
अबै घणो-कीं फरक नीं
बालाजी वाळै जांट हेटै
अबै नीं खेलै कोई चौपड़-पासा
हां, हाथां मांय रचीजण वाळा
जाळ अवस बधता ई बगै
मिंदरा मांय आवाजाही खूब है,
आ बीजी बात है
कै घंटियां री टणकार
फगत कानां ताणी पूगै
हियो नीं परसै
चौमासै मांय
नाळी चालणै सूं लेयनै
खाड़ी जुळ रै भविख ताणी
लागणवाळी होडां
अबै बदळगी है
मिनख री भख लेवणै वाळै सट्टै मांय
मौसम गमाय दीन्हो है
खुद रो मिजाज,
आठूं पौर अबै
अेक जैड़ा है दिन-रात
आं गळियां-चौरस्तां,
गुवाड़, मिंदर,
स्कूल, ढप, दरखत,
बायरां पर पड़्यै
बदळतै बगत रै जाळ
ऊपरांकर हुयनै
हरेक ठौड़ सूं होळै-सी ताकती
जूण-रस सूं भरी थारी मुळक
वा री वा है फगत
जे आ नीं हुवै,
तो इण गांव री
ओळख ई अबखी हुय ज्यावै रिंकी!
