गंदी हवा
कित्ती बेगी
कांनी-कांनी पसर जावै
म्हां टुकड़ा-टुकड़ां में पिछाण सकां
बदबूदार हवा नै के
आ पंजाब री है
आ दिल्ली सूं आई है।
आ आसाम सूं
अर आ बोलनगीर सूं
आ हवा हिन्दू है
आ मुसलमान
आ सिक्ख, आ ईसाई
पण है एक सीरखी- गंदी हवा
अलेखू रूंख
फूल, बाग-बगीचा रै व्हैता थकां ई
गंदी हवा रौ असर
बन्नाटो मारै मिनखां रै भेजै मांय
उखरड़ी व्हैगा है स्हैर
अर, कचरै रा ढोल व्हैगा है दिमाग
आफत नै तेड़ी देवती
गळतफैमियां तिरै आ हवावां में
कूड़ा धरमजुद्ध लड़ै लोग
मिनख मरै अर टाबर रुळै सगळी जगै
जठै सूं नीसरै
अर जठै तांई पूगै आ हवा
केई बार
ऊंची अर लाम्बी-चवड़ी इमारतां सूं नीसरै
आ लाय
सड़का, गेलां, गळियां व्हैती
गांव-गांव, ढांणी-ढांणी पूगै
भखै भोळा मिनखां नै!
भोळा थै, अर भोळा म्हैं
नीं जांण सक्या अजै तांई
के दलालां री रोटी
इण लाय में इज सिकै।
