म्हैं कुण हूं?
प्रीत रा पुस्करजी रै पावन पगोतियै
फागणिया हथेळियां ऊग्योड़ा
लीला जंवारा बोळावती गिणगोर?
कै चांद री इमरत डोळियां रै ऊपरवाड़ी
बरसता मेघां ज्यूं ढळती
माटी री तीतर-पांखी सोरभ झिकोर?
म्हैं कुण हूं?
इतियास री खड़ग-लेखणी सूं
रगत-मसी में सींवां बदळता भूगोल रा
अडोळा चितराम री खांडी कोर?
कै रंगसाळ में चितारियोड़ी
ऊभी आंगळियां सांनी करती
कुळ बहुवां रै डाबर नैणां झरती
भाटा री नागी पूतळी रा लेवड़ा री लोर?
म्हैं कुण हूं?
तोड ज्यूं उछेरी म्हनैं धोरां जैसलमेर
झेकाई बाळू रेत
बड़ री साख बांधी
सिणगारी सोनलियै गिरबांण
गोरबंध कवडाळां;
नीरी नागरबेल,
तो ई बाजती नळियां
बिछड़गी झोक सूं
कतारियां रै देखतां देखतां!
पाळिया वासक म्हैं
मनड़ा रै रोहिणी द्रुमां
रचन-कचोळां ईसका पय पायो
डाढां डसायो कंवलो काळजो
विस री गहळ बितायो
रांमतिया-रमतो बाळापण
सूंघती चंपा री चौथी पांखड़ी
पूगी बागां मंडोवर रै
चरती आफूनी रा फूल हिरणी ज्यूं
सोई मेहूड़ा री छांव
गुळक्यारां फाळ सांध्या
इमरत कर पीवी म्हैं
रविजळ री छळ-छौळां!
बदळो चुकायो यूं
अणजाण्या मावीतां रै पाप रो,
धुतकारां, ओझाड़ां, संताप रो,
अणसमता हांचळ चूंघ्या दूध,
फाटै गावां री
गांठ घुली निरधनता,
हटक रै होड़ां दियै जोबन रो,
रोक-टोक रमता रूप रो,
बचपण रो,
मेहणा री बोली रो,
नारी निबळी रो
गोली रो
जोबन रै कामरूप बादळां री रींझ
टहूकी जोधांणे टेकरियां लाल सिहरां,
मोर ज्यूं पांखां रा छतर तांण!
पण देख पगां सांम्ही
ढळकाया आंसूड़ा
कोट-कोट, कांगरै-कांगरै
तनवन राज कियो जोबन सादूळां
सरवर री पाळ
मदगहळी गजगांमण सूं करी चूक
कुंभ नै विदार गजमोती लिया काढ
मान कियो धणियाणी,
मांणी तो राज-सेज मौजां बस म्हैं मांणी
हिंगळू ढोलिया रै बादळ पथरणै
जठै-जठै म्हैं फेरिया पसवाड़ा
उठै-उठै बिगसिया फूल
रातराणी, चंपा, गुलाब रा
अर सपनां रै समदर-तकियै
जठै-जठै ओसरिया मोती नीरद-नैणां
उठै-उठै भरग्या
पीछोला, बाळसमंद, आनासागर!
तरणापै अंतेवर अंकमाळां
भीमळ- नयण मारग नीहाळती
प्रीत री पुरवाई रा संदेस री
कुरळाई रत-पंखी कुरझड़ ज्यूं
'तिरसी हूं, तिरसी हूं'
सेवट उडगी सरवर रै ईरां-तीरां
जोड़ी सूं जुड़ण
मनड़ा रै कोटड़े
गोली बण भावन रची भाटिया री
राणी बण रंग दियो राठौड़ां
झोरावा गाया कोटड़िया रा
संपूरण नारी ज्यूं
म्हैं कुण हूं?
जिणरे कूं-कूं पगल्यां री खोज
'खोज गई' गाळ खाय
ओठै-ओठै हालती कुळबहुवां
सतियां के राणियां!
प्रीत री कामधेण म्हैं तो
समाज रै मीट-मारग रै
(मुईदार ज्यूं)
टणमण टोकरा बजावती
आगै निकळगी छांग रै
टळगी म्हैं टोळी सूं
म्हनैं टोळण आया 'आसाजी'
दूवा सोरठा गीतां कवितां रै टिचकारै
पण म्हैं बधतीगी
खेतां-खेतां, सरवरां-पोखरां,
बागां-बगीचां, चरणोयां
थळां-मरुथळां
म्हैं कुण हूं?
बाघाजी रो जस अपजस
हिवाळां ऊंचो, ऊंडो महराणां?
कविता कोटड़िया री
अरथां, संकेतां, सबदां परबारी?
परोकी प्रीत?
नेह गाढा मारु रो?
बिना हाथ हथळेवो?
गांठ बिना गंठजोड़ो?
बिन सावा परण्योड़ी?
जलमी कठै, पाळी कुण
किणरो म्हैं घर मांड्यो
सती हुई किण साथै
आडी ज्यूं समाज री
म्हैं कुण हूं?
सरीरां असरीरी?
नाम जात कुळ बिहूणी
क्रौंच पांखी आद कवि री?
चंडाळी?
खंडाळी
रूप री बणजारण
बडारण जोबन री?
आदण ईसका रो
रेख के हथाळी री
लीक सूं टळियोड़ी
उछाळो दबियोड़ी माटी रो?
ध्याव सुरसत नै, सिमर गणपत जद
मांडोला छंदां-अछंदां
सबदां में बांधोला प्रीत री कथा कोई
बरणोला नारी नै
थे ई बतावोला पीढियां नै
'कुण हूं म्हैं,
भासा रा भावी कविसरां!
