हेली! च्यार घड़ी चोमासो।
बाकी सूखो बा’रा मासो॥
मौसम रो मिज्जाज मिजाजण।
है सुर बदलू साज मिजाजण।
जूवै जीवण-राग मिजाजण।
पलट्यां सरसी पासो।
हेली! च्यार घड़ी चोमासो॥
चलतो चाक अटकणो कोनी
बीत्यो बखत पलटणो कोनी
सांसो कदै सलटणो कोनी
सलट्यां सरसी सांसो।
हेली! च्यार घड़ी चोमासो।
चाँद चढ्यो गिगनार अटारी
बीत्यां पाछै रुत बिणजारी।
कंवळी-काया केसर क्यारी
पड़सी रूप कळांसो
हेली! च्यार घड़ी चोमासो॥
