धोराऊ धरती, आभै बीजळियां,
सावण री आसा, जिंदगाणी काटी,
फोगां-कैरां में अळझया सपना,
कानां दे सुणजौ, बोलै है माटी।
आगोतर साध्यो, अन्तस बिसरायो,
मिनखापौ तौई नजरां नीं आयो,
पूछै है तारा, पूछै है घाटी–
फळसा बणता क्यूं बीखरगी ताटी?
चौड़ै-चोबांरा फसलां कुण लाटी?
पूछै है तारा, पूछै है घाटी,
परवार्यो क्यूं रे! आदम रो जायो,
सूरज जुग-जुग सूं संदेशो लायो।
घिरतां-विरतां री छाया गरणावै,
सदियां सूं बाबो रागां अरथावै
लिखदी बेमाता लिलाड़ा-लैणां,
अपणी तकदीरां, दोखज नै सहणा।
जोवूं जद अपणी, हथाळ्यां सामी,
बूक्यां रै पाणां तकदीरां जामी,
पूछै है धोरा, पूछै है डांडी
‘आदम-खेजड़ियां’ कीनी कुण खांडी।
आभै कुरजड़ियां, पाताळू पाणी
चौड़ै चौबारां पूछै है माटी
धरती रो धेजो, डायो रे डायो
मिनखापो तोई नजरां नीं आयो।
सबदां सुघड़ाई मानां, हां मानां,
मानां हां थारी, रंगभीनी रातां
सुरगां रा सपना, अरथा रा आंटा
मानां हां थांरी, नखराळी बातां।
पूछूं इक म्यानौ, उभा जुध जुग सूं
भाठै भाठै में रमियोड़ै रब सूं
कद सूं रे कद सूं, कद सूं रे कद सूं?
पूछूं इक म्यानौ उभो जुग-जुग सूं
लिलाड़ां कुण म्हारै पूरबला लिखिया?
गोरा क्यूं गाजै, काळा क्यूं दुखिया?
पूछै है म्यानौ बळतोड़ी बाटी,
सपना ज्यूं सुरंगी, जुगां कुण लाटी?
