अै खिलाड़ी बावळा है मिनख मारै तोड़ में
जीतसी अै जीतसी सत्ता री सगली दौड़ में
फूल चम्पा रा हंसै ज्यूं आप ई झर-झर हंसो
बेम ऊठै है कै कोई नाग होसी गोड़ में
सज्यो पीताम्बर गळै माळा तिलक छापा घणां
कुबद घट में छिलोछिल होसी भर्योडी होड़ में
ताम झामां री कदर बधगी करैला काम कुण
नाम रो सिक्को असल मत पड़ो माथा-फोड़ में
सादगी मिसरी सूं ई मीठी घुली इण में मुलक
बांक आंखां में अनोखी है कपट रै कोड में
नाचती व्है आंखियां अर थिरकती होवै मुळक
किणरो हियो नीं ऊलळै इण आपरी मरोड़ में।
