तूं लागै घणी रूपाळी
थारी-म्हारी गजब जमैला, सुण गजबण मतवाळी
तूं लागै घणी रूपाळी…।
राख चाव तूं न्याव करै,
तिरपत जिवड़ो कर दे
खाली पड़ी आ नेह री गागर,
सींच नयण सूं भर दे
रूंख प्रीत रो पळज्यावैला जे थोड़ो अठीनै भाळी
तूं लागै घणी रूपाळी…।
आती-जाती दे निसकारा,
मूंडै सूं ना बोलै
सपणी-सी बळखाती कमसण,
आम्हीं-साम्ही डोलै
बाण चलावै देखो मरवण तीखा नैणां वाळी
तूं लागै घणी रूपाळी…।
छम-छम तूं छणकाती चालै,
पगल्यां पायल गोरी
रास रमीजै मन री चौकी,
मची फाग रंग होरी
पिणघट पर पिणिहार्यां सागै देवै हाथां ताळी
तूं लागै घणी रूपाळी…।
मनुवारां री मुधरी बातां,
काढ काळजो लेगी
आपां दोन्यूं रास रमांला,
आवै नी नैड़ी बेगी
मन भाव उफाणां लेवै बातां सुण हिवड़ाळी
तूं लागै घणी रूपाळी…।
