अकारथ औ कूकारोळौ
थूं थांरै मनां री बस्ती सूं
तगड़ियोड़ौ
थांनै इब कठै ढ़ोई
थांरी पगछाप सुणतां ई जंगळ में
जरक लागै
अपसुगनां रा पाळी
समाध सूं जागै
अेड़ौ निरभागियौ थूं
कै थांनै देखतां पांण कुदरत आपरा
लटूरा बखेर
आटी-पाटी लेयनै सूय ज्यावै
थांरै मांय-मांय
अकथ दुख रौ बळीतौ
अस्ट पौर बळै
अर हंसी रा टणमण टौकरा
थां सूं
सौ कोस दूर टळै
मणि मधुकर!
इण भांत
ताकळां रा घौदा सेवतां
घौड़ां रे पौड़ां नै सूंई छाती लेवतां
कित्ताक दिन धाकौ धकैला
कद तांई थूं मिंदर नै पीठ देय
रांमजी सूं रिसांणौ करैला
गिरै-दसा री गुवाड़ी में
पाकै खोखां री ज्यूं खिरैला
जिका मोर थापळता वै अबै
कांटां वाळी झाटी लेय थांनै सडिंद-सड़िंद
सुरड़ीजण लाग्या
अर जांणै कीकर चेता-चूक व्हैगौ थूं
कै हाल तांई
वां रा
मौकळा जस गावै
नै होळै-होळै
हीयै री अधार-अगन
चेत करै
सांची कवूं
आजकाळ थांरै
अैदी सुरग्यांन सूं
आखा मसांण डरै।
