सुण म्हारा भाई,
सिक्ख अर ईसाई!
हिन्दू अर मुसलमांण!
आखरां री उघाड़ी जांघां नै
दोगली जीभां सूं चाट’र
उपदेसां री ओकारियां करता—
सिंघासण रै ओळै-दोळै भंवता
कुत्तां नै पिंछाण।
नागौ करनै देख
उणारौ सगळौ कारोबार
थारै गळा में सांप’र
वां रै गळां में हार,
थूं वांरी जीभां री सळां में है
उणांरी निजरां में कठैई नीं है...
वै बोपारी है
आज
धरम री ताकड़ी में
तोल’र बेचसी
कालै
लोकतंतर रै
कांटीलै गेडियै सूं हांकसी
थनै संसद रै बाड़ै में
क्यूं के थूं
आंधी लरड़ियां रौ
अेक रेवड़ है
अर लरड़ियां
भलांईं नीं व्है हिन्दू अर मुसलमांण
पण
भोळी अर अजांण व्हिया करै।
