सौरम सूं मदछक
माटी री आंख्यां में
रंग-बिरंगे सपनां रै गूमेज माथै
अेक कूणै में हंसती
बिखर्योड़ी फूलां री पांखड़ी
धर मजलां
घर कूंचां
धरती अर आकास री
गैराई नापण आळा
पगां रै मन में
किणी तीरथ सारू सवाई साध
रात-दिन
तोपां रै धमाकै सूं
धड़कतै गढ रो
सूनियाड़ रै तळाव में
तर-तर डूब जावणो
हर्या बिरछ रै मैदान में
खामासी कांनी
टुकर-टुकर देखता
सूखै पत्तां रो
आखरी सलाम
तो इचरज हुवै
सूखतै हाड-चांम रै साम्है
ऊभी कोठ्यां रै मांय
गरीबी री मजाक उडावता
लोगां री भेदभरी हंसी
म्हारै तो
क्यूं नी समझ आवै
बखत थारी भासा।
