Quick Links

अंजस सोशल मीडिया

मारग रै सीगै

चन्द्र प्रकाश देवल

आप पूछ लियौ सिरदारां

जद इज अरज करूं

के औ अंवळौ मारग औ संवळौ मारग

के औ करड़ौ मारग औ कंवळौ मारग

औ मसांण रौ

औ सफाखांना रौ

औ इस्कूल रौ

औ जच्चाखांना रौ

वौ बाग में जावै

औ बनी में

बौ उछाह में

औ गमीं में

औ सुक्यारथ रौ

वौ अक्यारथ रौ

औ पाप रौ

वौ पुन्न रौ

वौ ठारी सूं ठर्‌योड़ौ

औ लुवां सूं तप्योड़ौ

वौ ऊजड़

औ पाधरौ

वौ छै महिना वाळौ लांबौ

औ बार बरसां वाळौ छोटौ

वौ दुकान रौ

औ घर रौ

वौ मिंदर रौ

औ हटवाड़ा रौ

नीं नीं वौ हटवाड़ा रौ

औ मिंदर रौ

माफ करावज्यौ

पांतरग्यौ

औ हटवाड़ा रै मिंदर रौ

अर वौ मिंदर रै हटवाड़ा सै

लांबौ गब्दोळौ व्है

हजूर, मारग नै लैय हरमेस

इणनै आप यूं समझ लिरावौ

के सगळी चीजां मारग रै ढावै है

अर वां सगळां कनै कर औ मारग जावै है

असल में आप म्हनै फरमावौ!

यूं घुमाय फिराय मारगां रौ पूछण मै

कांईं सार

चवड़े नीं तौ खानगी सरकावौ

के सांचाणी आपरै जावणौ कठै है ?

हां महरबान जावणौ अेक बात है

अर पूगणौ साव दूजी

म्हैं जांणू जित्तौ करज करू

औ जिकी रावळै ऊभा हौ

आपरै ठीक पगां नीचलौ मारग

अहिंसा मारग है

जिकौ पाधरौ पूगै है कसाईवाड़े

धकै जावै है उपासरा लग

इणरै कन्नै कर डावौ टळतौ औ मारग

जोसियां री खटकळ बिचाळै कर जावतौ

पूग जावै अेकदम सिलावटां री मजीत रै मूडांगे

रीस थूंकावौ

मारग रं थोड़ी व्है लोतर

वौ फीटौ तौ घड़ी घड़ी

फगत व्है काफर

राजपथ व्है जिणनै अधबिचाळै सूं

काट न्हाखं जनपथ, खामोखां

कीं लेंणौं न कीं देणौं

पण मारग है

इणनै ओडौ दैवणौ ई बिरथा

फुटपाथ व्हैता तौ कीं कैवता ई खरी

पण फुटपाथ मारग में कद गिणीजै

फुटपाथां रा कद व्है न्यारा नांव अर रूप

वै तौ बापड़ा

गोलीपौ काढता पड़या रेवै आस पासै

सियाळै ठारी भुगतता

मूंगफळियां रा छिलका ओढ सूय जावै

हर कोई बुआ जाता

थूंक सकै आपरी पीकां

हां, आरी अेक तासीर जबरी

के आ माथै चालता पग

आ माथै आडा व्हियोड़ा पगां नै

चिगदै कोनीं

या फुटपाथी कांण है, हजूर

कोई लिख्योड़ो संविधान थोड़ी

बाळौ आगी विरथा झिकाळ

आप तौ मज्झ मारग रा मारगू हो

खड़ौ-खड़ौ आखता खड़ौ

आप-आपरा रथ

पधारौ-पधारौ

सगळा हाइवे दिल्ली इज पूगै है

हां, तीरथां पधारणौ व्है

तौ आ पातळी सड़क अजोध्या जावै

वौ संकड़ों मारग कासी, मथरा, प्रियागराज

खराखरी तौ नीं केइजै

पण सुणी है

लोगबाग काना में बात करता हा

के असल में अै पातळी'र सांकड़ी सड़कां इज

आवता काल रा हाइवे है

आ माथै कर हालता जावौ

सेवट री बाजी पूग ई जावौला रजधांनी

पण बेसी ट्रैफिक व्हियां

पगां सूं पड़ जावैला गडारां

गडारां सूं होळै-होळै खाळी

खाळी पछै नंदी

आ नंदी बांट देवैला

आवगा कांकड़ नै, दोय कन च्यार न्यारा-न्यारा खाना में

अर न्यारा खाना री न्यारी रजधांनी व्है इज है होकम

इण सारू आज कोई नीं सिधावै

आ मारगां

तौ सावळ है

पछै आपरी आप जांणौ

इत्ती ताळ सरवर व्हैतौ तांईं

चमकी मार काढ लेवतौ छांण

चुग लावतौ मोती

पण हजूर मिनख रै मन रौ तौ

मारग ई अंवळौ

नीं धंसीजै सौरे सांस

अर

नीं निकळीजै

फरमावौ रावळै किस्या मारग री दरकार

अठै ऊभां-ऊभां तौ कठैई नीं पूगीजैला

आ बात हथिकी

अर पधारणी आपरै है

मारग बावत बतावणिया रै तौ कठैई जावणों नीं व्है!

औ आप नगसौ किस्यो खोल राख्यौ है

औ तौ आपांरै भारत रौ प्राक्रतिक नगसौ है हजूर!

इणरौ हेमाळौ

'पोलेटिकल मेप' में जावतां ई बदल जावै

आ भूगोल री गलती

आप क्यूं भुगतावै?

इणमें अे जिका मंड्योड़ा है मारग जात

वै मारग कोयनीं

नंदियां है हजूर

अर आं माथै जावतौ मिनख साचाणी डूब जायां करै

मरजी व्है ज्यूं 'मेप' रौ मुलायजौ कर लिरावौ आप

कर धणियाप

म्हैं गलत नीं अरज करू

म्हारौ गलत कैय'र कांईं करणौ

गलती रा मांडणा भूंडा

मंड्यां के उघड़े

आप ई दिखावौ

भूगोल री इण गलती माथै

रीस खाय ऊफणै नंदियां आयै साल

'पोलेटिकल मेप' माथै

अर पाड़ देवै अठे-वठै, चोमेर

मारग ई मारग

खेतां में, घरां में, गुवाड़ में

उंडा-सेवा, चोड़ा-सांकड़ा

मारग ई मारग

इण गत आ 'पोलेटिकल मेप' मापै मंडता मारगां सूं

मरै फगत 'नेचुरल' मानखौ

मारग पांणी रौ न्यारौ

मारग अगन रौ न्यारौ

मारग 'अेसिड' रौ न्यारौ

मारग 'अेफिड' रौ न्यारौ

मारग 'टाइड' रौ न्यारौ

मारग 'सुसाइड' रौ न्यारौ

मारग आपरौ न्यारौ

मारग म्हारौ न्यारौ

इणसू धकै कांईं अरज करै औ नाचीज

रावळे कठैई नीं सिधावणौ व्है

तौ नेठाव सूं पागड़ौ छांड

घोड़ा री मोहरी झिलावौ

म्हैं घोड़ा नै चारौ नीर दू

अर आपरै बिछावणौ कर दूं

आराम फरमावौ!

अरज करूं कै कठैई नीं जावतौ ई

व्है अेक मारग

जिणनै म्है

गांवडू मिनख

चोवटौ केवां!

स्रोत

पोथी : मारग ,
सिरजक : चंद्रप्रकाश देवल ,
प्रकाशक : देवल प्रकासन, गोटीपा

जुड़्योड़ा विसै

Quick Links

अंजस सोशल मीडिया

मारग रै सीगै

Quick Links

अंजस सोशल मीडिया

Write to Us

THANK YOU FOR CONNECTING WITH US!