कैई बरसां तांईं नीं सूणियो म्हैं
म्हारी मां रो नांव।
गांव रा कीं लोग मां कैवै
अर कीं फलाणै री लुगाई,
अर कीं तौ बूढ़की रांड ई कैवै।
मां रा अै नाम कुण राख्या हा
मां नै कदैई ठा नीं पड़ियो!
मां होळै-होळै पांतरगी आपरो नांव।
अब जिको ई हेलौ दैवै
मां रो काम फगत हांकारो देवणौ है।
मां कीकर भूली हुवैला आपरो नांव?
रोज बिचारूं म्हैं!
पण म्हैं ई कदैई हेलौ नीं दियो
उणनै उण रै नांव सूं।
घणा ई दिनां लग
बाट जोवती रैई मां आपरै नांव री
पण किणी हैलो नीं दीन्हौ
उणनै उणरै नांव सूं!
