आंगी रै
कसणां में
कोडियां जड़ै
कांमणगारी
रामलीला मैदान में
थूक
बिलोवै
थेथड़राव
सिंसद रै झाकरै में
झेरणां री
झिकाळ
नै होठां में
चूंटियौ
बाकी रा दळ धूड़ सूं
मूंडौ भरै
संविधांण रै थणां में रम्मै
चींचड़ा
नै बुग
कलजुग रा
कांदा खाय'र रोवै
सत्तजुग
निवड़ग्या
छोडा
नै लकड़ी रा फाचरा
हरीजणां
नै आडा ढ़ाय
बळीतै री ज्यूं सुकाय
अर मांय सिरकाय
लोग
होळी बाळण रौ सुंवाज बिठावै
चंग बजावै
रामराज रौ भगंदर
लांघै मांमराज नै
चाकर चांमराज री धमाळ गावै
तास री बावनी हैली में
खरड़ाटा
भरे हुकम री बेगम
नै गोलौ
गोली रे ढूंगा में गदगावड़ी
करै
ईंट रा पत्ता
पथराव रौ जुगाड़ बिठांवता
चौवटै री
गुद्दी में च्यांनणौ
चमकावै
पांन री दुग्गी
सिरकार
रौ गरभ गेर गुवाड़ में
जच्चा री ज्यूं राजी-खुसी
जळवौ पूजण जावै!
