किसी भोळपण
मां भुळी ई नीं
गायो दीपक राग?
क्यूं गायो दीपक राग?
स्यात, जगत मां
जगर-मगर दिवलां री जोतां
देखण री ही मन
मां म्हारै
स्यात अठै जो घट-घट व्याप्यो
अंधियारो ठालो बैठ्यो है
मिनखां रै हिरदै चढ्यो है
रात काटणै उणरी
गायो दीपक राग।
दिसा-दिसा दीसै उजळाई,
दीपै जग रो हर-हर कूंणो
इस्या-इस्या ई
कर-कर कितरा मता विचार
कोड-कोड मां
भूल्यो-भूल्यो
गायो दीपक राग।
हाय!
जोतां जगर-मगर नीं होई
दिवलां री बात्यां भी रोई
घट्यो न ढेरमढेर अंधारो
ना दीपी ना उजळी होई
कोई दिसा
जिस्या रा जिस्या
रैयग्या
सगळा मनसूबा
बळै काळजो
क्यूं कै गाय दीन्यो
मैं ओ दीपक राग।
