कुण देखै थारी झूंपड़ियां
कुण माथै री हीर-कणी
कोरा आंबर आंसू राळै
कहणै री है पीड़ घणी
टूटी खाट मडीला टूटा
सूखी साखां कुण धणी
किस्मत री कोरी पाती नै
बोलो करसा, कुण भणी
जग रो दाता पाटी बांध्यां
लूआं सरदी नहीं गणी
फाट्योड़ा पूरा में चिलकै
धरती री सिणगार-कणी
टाबर-टीकर रोटी मांगै
हिवड़ै हालै टीस घणी
च्यांरूमेरा पल्ला खांचै
अब धणियां रा कुण धणी
भाग भरोसै बैठ्यो भाई
के पूगैलो चांद तणी
अबै चेत जा आज बावळा
ऊंडी गाडो फाळ अणी
