रड़की है…
ठेठ हेमाळै सूं ले
गहरोड़ै उण समदर तांई
खागां हंदी सिंधु कड़ियां
भड़की है।
भुजबळ रै पाणां
रणचंडी हाथां ले खप्पर
नाची है।
काळी मतवाळी
मदमस्त करां धर किरपांणी
टाळी हैं।
जिकण आंधियां ऊजड़
सांप्रत भिड़नै सदियां तांई।
जठै गाईजी…
इमरत वाणी घण संतां री
जठै उड़ी ऊंची गिगनारां
धवळ पताका धरम-करम री।
जठै…
पोमचो पीळो परतख
साख भरै है
सतवंतियां री
जठै अजै तक…
मूमल नै मनवारै मैंदर
ढोला-मरवण मीठा-मधरा
हेत-प्रीत रा रंग रचै है
जठै अजै तक…
गूंजै रागां
रावणहत्थां-अळगोजां री
जठै अजै तक…
नड़ मंजीरां झींझां ढपली
सुरणाई रा सुर साजे है।
जठै अजै तक…
कात्ती रै खेतां में किरसा
भिणत तणा दूहा अरथावै
काछबियौ-राणलियौ गावै
तीज तिंवारा लाडा-कोडां
सकळ सुरंगा रंग रचावै।
जद कैवूं कै…
समदर में सूखैला पांणी
ढह जासी आबू रा भाखर
गळ जासी हेमाळो अेकर
तो ई म्हारी थार धरा रौ
नीं सूखै
आंख्यां रौ पांणी
कीरत री बातां नीं जावै
गळै नहीं इतिहास सूं आखर।
क्यूं कै म्हारी…
अंतस री सतरंगी सांसां
काळ-दुकाळा सूं गुजरी है
घोर अभावां सूं जूझी है
म्हारी इण झींणी झूंपडियां
मांडी है गरबीली गाथा
म्हारै इण खेजड़ियां-खींपां
जियाजूंण नै परतख जीवी
सैवण सुरंग बोरड़ी म्हारी
जाळ आकड़ा साथै न्यारा
रोहिड़ै रा फूल खिलाया।
जठै…
मिनख में मरजादां रा
ऊजळ मोती जगमग जागै
अंतस रा ऊंडौड़ा आखर
नैह तणी नदियां छळकावै
धवळ धोरियां!
मीठा मगरां!
परघळ प्रीत जुगां सूं पोखै
यां नै बीर, संभाळ राखजे
अंतस मांय अंवेर'र राखजे।
