रसवंती रमताणी धरती
जसवंती कल्याणी धरती
भारत री भद्राणी धरती
जय जय जय जनवाणी धरती
अगन पवन भूकंप न धारै
तरवर-सरवर रूप संवारै
मरुधर गिरवर आ अवतारै
जिया जूण नै आ बुचकारै
नदियां बेग उझाणी धरती
मोरां नाच नचाणी धरती
जय जय जय जनवाणी धरती
पांखी इण रा गीत उचारै
समदर लुळ-लुळ चरण पखारै
सूरज झूमै इणरै द्वारै
चांदी इमरत ईं पर वारै
खेत-खेत इन्द्राणी धरती
हेत-हेत हुळसाणी धरती
जय जय जय जनवाणी धरती
धरती गरबगीर बौ ज्यांरै
बो न मानखौ हिम्मत हारै
लोकराज मरजाद पुकारै
आ धरती किण रै ना सारै
वीरां मान बधाणी धरती
वीरां ध्यान धराणी धरती
जय जय जय जनवाणी धरती
