ओ —घमलै रा फूल’ फूल’ तूं
मत कर इतरी भूल
आज नै आज सिंवर जै —रे
अधीरा धीरज घर जै— रे॥
मे आंधी रा माय थपंड़ा
लूवा लाय तपी देही
'भंवर’ भतूळा फिरै भटकता
मान हाण ना तज देई
तूं शीश रो सोदो कर जै — रे
तूं लिपळां स्यूं मत डर जै— रे॥
चार चौफैरी घणा रूंखड़ा
सुण’कुण सार करै बांरी
पाखी पोख फळां लदियोड़ा
जगती बात करै वांरी
तूं फळ दै बात बिसर जै —रे
तूं काळी रात बिसर जै —रे॥
पल दो पल री जूण जेवड़ी
अण गिणती रा आंटा है
फूल फूल रै आसै-पासै
छोटा मोटा कांटा है
तूं अमर रा आखर भण जै— रे
तूं कांटां स्यूं ना डर जै— रे॥
बरगद हाळी छांव सरपणी
काची कूंपळ नै डसलै
इसै रूंखड़ां रूंगस नै
खेल खेल में तूं लख लै
तूं आंरो साथ बिसर जै— रे
तूं बण बण लाय पसर जै— रे॥
मां धरती रा सुमन लाडला
जोगी जाग जुगत कर लै
सांप सळीटा अजगर ढीठा
पकड़ मूंड की बस कस लै
तूं बिस रा गुटका पीजै रे
आ-काया आप रसी जै-रे
ओ घम लैरा फूल’फूल तूं
मतकर इतरी भूल
आज नै आज सिंवरजै— रे
अधीरा धीरज घर जै— रे॥
