कतना दन और? अस्यां कतना दन और?
तासां का ताजमहल, ये भींतां रेत की,
ब्याळू की बेरां, कोरी बातां खेत की,
यौ नटबौ बेबस
ये खाटा अर अधपाक्या बोर! कतना दन और?
हांडी पै जाळा क्यूं पूरै छै मांकड़्यां
चूल्हा की पांती में धूं देती लाकड़्यां,
भूखा ही बैठ्या रै
भोळा टाबर मूंडा धोर! कतना दन और?
पाताळां पाणी की आडी झुक झांकबौ,
मिठबोलां मेघां कौ, डूंगरिया डांकबौ,
भाटौ ज्यूं-कौ-ज्यूं
पण घसगी या ऊमर की डोर! कतना दन और?
छांनै सै जा झांकै, सूरज भंडार में,
कोई की अंगणाई, तड़पै अंधार में,
मिनखां ई रहणौ छै
कतना दन बण गूंगा ढोर? कतना दन और?
आऔ चूरौ पाड़ां, ईं बादळ महल में,
तणग्यौ क्यूं राखौ छौ, रूई का महल में,
यौ खटकौ मटज्या
पण चाहीजै झटका में जोर! कतना दन और?
कतना दन और? अस्यां कतना दन और?
