दादी रै
कड़तू सूं बिलूंबती
कूंची, कांटोकाढणी अर दांतकुचरणी
म्हारै खातर विग्यान ई है
अर संस्कृति ई है
इण कूंची रै आसै-पासै
खेल्या म्हैं बाळपणै रा अलेखूं सुपना
गोगा मांडणिया म्हारा कंवळा हाथ
ठा नीं कित्ती बार
नींद में सूती दादी री तागड़ी सूं
लटकती कूंची अर घुळगांठ नै
अळघी करण रा जतन कर्या हा
जद-जद पाटता बसबसिया
रूसतो म्हारी जिद पूरी करण खातर
आ ई कूंची
दादी री तागड़ी सूं उतर’र
बोदी पेवटी तांई री जातरा करती
लाल सुरंग बोदी सिंदूक सूं निकळता बारै
मखाणा, नींबूरस री फांक अर कपूर री सौरम
दबकस कर’र राख्योड़ी हांती
म्हारै खातर औ ईज हो
टळकता आंसुवां नै ठामण रो अेग्रीमेंट।
कड़तू रै लटकती कांटोकाढणी
दादी री ब्याऊ फाटेड़ी पगथळी में
दिखायो म्हारी नान्ही आंख्यां नै
पैलीपोत जळडमरू मध्य
दादी री पगथळी रो भूगोल
अंतरिख में गेड़ा काटता धरती रै भूगोल सूं
साव अळघो – साव न्यारो
पगथळी रा खाळां में
नीं बैवै लीलो चरूड़ पाणी
पण देख्या म्हैं
जूण-जथारथ रा रींगा
तागड़ी सूं लटकती कूंच्यां
कड़तू सूं लटकती कांटोकाढणी
पल्लै रै बांधेड़ो सिक्को
म्हारै खातर साच्याणी
सो-कीं हो।
