ऊंची-नीची कांईं न्हाळै म्हारी नखराळी गणगोर?
म्हारै छपरै ढळती संझ्या, म्हारै आंगण उगती भोर
म्हारा आंसूड़ां की मूरत, म्हारा काळजिया की कोर।
काळो काजळ, राता डोरा, थारी आंख्यां को सणगार।
माथै केसरिया बीन्दी धर, करती सूरज पै उपकार।
होठां केसर क्यारी फूटी गालां मैं काची कचनार।
बादळ पाछा ऊपर चढ़ग्या थारा बाळां नैं सुळझा’र।
गोरी मांग बणी पगडंडी,
राखड़ली मोत्यां की झंडी,
मूंडो दूधां धोयी मंडी,
थारो रूप घणो चतचोर।
चामळ मा को सेळो पाणी, धोवै दूधां धोयो रूप।
रात्यूं चांदणियां सणगारै दन मैं गोरी उजळी धूप।
मावस का रूपाळा तारा थारा दांतां जड़ती चूंप।
पैदा कर अब तूं उजियाळो चन्दरमा डूबै गढ़ कूप।
फूलां-गोटा लागी चूनड़
अस्सी कळियां, लहंगा का पड़,
हारी परियां ईं छब सूं लड़,
माच्यो च्यारूं आडी सोर।
