कितरा ईज साल बीतग्या
पण
कोई माई रौ लाल
थांरै पड़कोटै में
तिरेड़ नीं घाल सक्यौ!
धनपतियां रौ गुमेज
रळग्यौ माटी में नै
दुनियां री अज्जादी रा डाकी डकरेल
थांरी चिटळी आंगळी सूं
पंजौ लड़ावण री
कोसीस करनै मांदा पड़ग्या
थांरी सगती थारै बूकियां में
थांनै किण री परवा
बम्मां रै गोळां तळै ब्याव-बांन
मुकलावै रा नेग-तेग
खेती नै खळा
कारखांनै री चिमनी रौ चै’कारौ
टाबरियां री भणाई
फौज-फांटौ नै दुस्मण रा दांतड़ा
तोड़ण री त्यारी
इतियास में थारै जेड़ौ कोई
दूजौ द्रिष्टांत नीं
जुंझारू जौत रौ अबै
अैक ई नांव...बियैतनाम।
जैसांणै नै बीकांणै रै
बियांबांन जमी-खंड सूं
भेजूं
म्हैं थांनै
सात सिलांम।
