भाखर रा भाखर गिटियां- ई
जिणरी थोथ नीं भरीजै
सूरज रा सूरज भखियां ई
जिणरा पेट में चांदणौ नीं व्है
चांद रा चांद चिगळियां ई
जिणरै हियै ठाडौळाई नीं सांचरै
समंद रा समंद खळकायां ई
जिण री ओजरी तिरपत नीं व्है
जिण रै रूं-रूं में
आंख्यां व्हैतां थकां ई कीं नीं सूझै
हजार-हजार मूंडा
व्हैतां थकां-ई कीं नीं बूझै
सांधै-सांधै कांन व्हैतां थकां ई
वा नीं तौ सुणै, नीं सांभळै
जणां-जणां रै हिवड़ै
घुळयौड़ी व्हैतां थकां-ई
जिणरौ कोई उणियारौ नीं
कण-कण में बसियौड़ी थकां-ई
जिणरौ कोई देस नीं कोई वेस नीं
घर-घर में घरवास व्हैतां थकांई
जिणरौ कोई गांव नीं
अलेखूं नांव व्हैतां थकां-ई
फगत भूख टाळ जिणरौ
कोई दूजौ नांव नीं
