समाचार पानै रै
पैलोड़ै पानै री
पैली खबर
बेगो आसी बसंत।
संतां री जुटी सभावां में
गाईजती भजन राग
बेगो बावड़सी बसंत।
मेड़्यां-मेड़्यां बंचती फड़ां में
बसंत रो आवणो बांचीज्यो...
भोगीजतै पतझड़ में
सुणीज्या बाजता पोड़
बसंत रै आवणै रा!
भूख भूलग्या भूखा
माच्या उच्छब देसो-देस
अडीक, अडीक, अडीक...
बाबो आ'सी बाटियो ला'सी-
री लापसी रा देखता रैया सपना!
झांकै झूंमका अलेखूं
किंवाड़ां री छीद में आंख्यां दियां
आंवतै बसंत री छिंया
पड़ी है कुणसी गळी..!
बांध पेट रै गांठ
आंवतै दिनां रै सुख सारू
सपना रै सुख बिचरता रैया
सगळा भूखा।
बसंत आसी, पण आसी।
नचीतो होय नै लेवणी नींद
देखणां सपना
उकळतै डूंगरां री आंच बिचाळै
उतरणी बादळां री डार स्यूं
नान्ही बूंदां बरसात री।
राखणी आस
कर लेणो बिस्वास
संबंधां री सड़ांध बिचाळै
कसूमल फूलां री आस...
मिनखाजूण रै आंगणै
सजसी कोई पालकी।
रेत रा रमतिया
खिंडसी भोरो-भोरो,
पितळाईजी जीभ
बोलसी
असल बात!
