बरसां पछै
ओजूं मैं भाळ्यो थारै सामीं
बठै री बठै, बियां री बियां, सागी ठौड़ थूं
होजरी री दुकान रै शो-केश में कैद—
जिणनै लुकोंवतो चाव-मोद
भाळतो बाळपणै लाग्यां मौको
बजार जावण रो।
अहल्या तो नीं हो थारो नांव?
भाटो ही थूं अजेस
बावां तकात नीं उगी
पैली ई नीं ही जठै बावां री ठौड़।
लागी वा मुळक थारी पथराइज्योड़ी
कीं तिरछी ही स्यात तिरछी टोपी रै कारण
मेल राखी ही जिणनै माथै थारै
तीजी पीढ़ी रो दुकानदार
देख्यां आयो याद
रंग-बिरंगा नीं हूंवता म्हारै बाळपणै
लुगायां रा मांयला गाभा
नुमायश सारू थूं थरपीजी जिणरी शो-केस-में।
आज थारै पयोधरां ही लाल चोळी
कूंकूं री ढिगळ्यां रळियोड़ै सूरज-सो
चमकै हो बिचाळै नान्हो अेक पीळो फूल।
मैं देखै हो थनै नुंवै जमानै
बदळ्योड़ी थनै म्हारै अणदेखै देख्योड़ै।
बोलीबाली अर तिरछी आ चितवन थारी
लेयगी बाळपणै रै कांई ठा किण चौरावै।
‘कैड़ा पवीत हा दिन!’
सोचै हो मैं अणछक पींवतो थारो रूप।
मैं नीं देख्यो म्हारी पूठ
कद आयग्यो अेक नौजवान
आंख्यां मींच्यां भाजतै ट्रैफिक री चपेट में
रोळै रै समै चथारै सूं निजर हटायां
देखी मैं छितरायोड़ी उणरी पांखड़्यां।
मुड़नै भाळी मैं पाछी थनै—
‘हे रामजी!’
चिमक्यो थारै उणियारै अणेसो देखतो—
‘ओजूं है इण चे’रै करुणा रा अैनाण,
गुन्नै रै ढाळै मैं कींकर भूलग्यो?’
