विडरंगा सपना है आंख्यां रो साच।
विडगंधी कळियां पर भमरां रो नाच।
आज रा किसण-अरजण दोनूं ई धन्न
धनख बाण नांखै है गीता नैं बांच।
गोखा ई गोखा, पण आख्यां आंधी
केवै वै, देखो थे रंभा रो नाच।
चेते रै’नैं बेली चालो मत थमजो
कूंळा पग पुहुपां में बिखरया है काच।
ज्यूं-ज्यूं म्है गावां हां मादक मल्हार
त्यूं-त्यूं ई मनड़ै में सिळगै है आंच।
आंसूं रो ढ़ळणो ई म्होटो अपराध
भूखां पर डण्ड़ पड़ै पायलियां पांच।
