पग में पैंजणियां-छणकाती
झीणै घूँघटियै-मुळकाती
पळका बीजळ-सा बरसाती
गजबण हिवड़ै नै हरखाती
आवै कामणी-कामणी॥
सुरमो नैणां में रमाती
चुड़लो चांदी सो चमकाती
लालां पळकै सामी छाती
हिवड़ै दूणी जोत जगाती
आवै कामणी-कामणी-॥
मोती नथली रो बतळातां
सूवो बैठ्यो कंवळै पातां
झूमर झीणां झबका मारै
मुळकै दाड़म बीज पसारै
आवै कामणी-कामणी॥
नैणा इमरतियो बरसाती
सांसां सौरभियो बिखराती
माथै चन्दो सो चमकाती
बैणी सरपण सी बळखाती
आवै कामणी-कामणी॥
माथै चूंदड़ली सतरंगी
मीठी आमलियां बस अंगी
लागै जगती सा बदरंगी
चूंदड़ माथै रंग बिरंगी
आवै कामणी-कामणी॥
लालां-गालां गीत पसारै
किणनै छोडै किणनै मारै
नथली बिंदली बात बिचारै
जुलमी जोबन किणनै धारै
आवै कामण-कामणी॥
धीमा-धीमा पगल्या धरती
नैणा-बैणा सेना करती
कूं-कूं पगल्यां सूं बिखराती
करती चालै धरती राती
आवै कामणी-कामणी॥
सीळी-सीळी पुरवा चालै
मत ना झेड़ो पल-पल पालै
रूस्या साथीड़ा मनालै
घूमर घालै चंग बजालै॥
आवै कामण-काणणी॥
अठ्ठै गौरां घूमर घालै
ईसर आगै लारै चालै।
आंनै कुण बरजे कुण पालै
तिरछै नैणा नूतो घालै
आवै कामणी-कामणी॥
