किशोर कल्पनाकान्त
लूंठा कवि-गीतकार। ‘कूख पड़यै री पीड़’ कविता संग्रै सारू साहित्य अकादेमी पुरस्कार।
लूंठा कवि-गीतकार। ‘कूख पड़यै री पीड़’ कविता संग्रै सारू साहित्य अकादेमी पुरस्कार।
जन्म: 04 Aug 1930 | रतनगढ़,भारत
निधन: 02 Jun 2001
किशोर कल्पनाकान्त रौ जलम 4 अगस्त 1930 नै चूरू जिलै रै रतनगढ़ मांय हुयौ। किशोर कल्पनाकांत सातवें दसक रा नामी कवि-कहाणीकार हा। वां लगैटगै साहित्य री सगळी विधावां में लेखन कर्यौ। भाषा रै फूटरापै रा धणी किशोर कल्पनाकांत री रचनावां में जूण री अबखायां, समाज रौ निजु मनोविज्ञान अर ओळै-दोळै पसरियोड़ी विडरूपतावां ख़ास तौर सूं निगै आवै। आं सब रै साथै वै राजस्थानी कविता जातरा में रोमेंटिक सेन्स रा कवि पण लखावै।
वांरी ख्याति एक ठावै संपादक रूप ई रैई है। वां तीस बरस लग ‘ओळमों’ पत्रिका रौ संपादन कर’र अर एक साहित्यिक पीढ़ी में सांवठै सैंस रौ विकास कर्यौ। ओळमों रा हरेक वांरी संपादकीय खिमता री साख भरै। वां आपरै मौलिक लेखन रै साथै गद्य-पद्यात्मक अनुवाद रौ ई काम मोकळायत में कियौ। राजस्थानी में वेद-वेदांत रौ पैलपोत गीतांतरण वांरै हाथां हुयौ।
वांरी एक दरजन सूं बेसी पोथियां प्रकाशित है, जिणमें ‘कूख-पड़्यै री पीड़, ‘मानखो हेला मारै’, ‘बळती दोपारी’, कूंपळ अर फूल' (सम्पादित कविता संग्रै), ‘सेक्सपियर री बातां’ (बाल कथाकरण), ‘विश्वनाथ सत्यनारायण री बातां’ (अनूदित कहाणी संग्रै), ‘नष्टनीड़’ (अनूदित उपन्यास), ‘किशोर-गीता’ (गीतान्तरण), ‘कुण-के है बो’ (केनोपनिषद रो गीतान्तरण), ‘देखै जिसी चितारै’, ‘मरवण तार बजा!’ आद सामिल है।
वांनै अलेखूं सम्मान मिल्या, जिणमें केंद्रीय साहित्य अकादमी रौ सिरै सम्मान (कूख पड़्यै री पीड़ किताब पर) ई सामिल है। जयपुर दूरदर्शन बरस 1996 में किशोर कल्पनाकांत पर ‘एक अणथक’ नांव सूं वृतचित्र बणायौ। बरस 2001 में वै सौ बरस कर ग्या।