निरमळ नीर री
अणूंती आब
नै हिबोळा खावतौ
दरियाव;थारै नैणां में ई
रात रौ निंवेड़
नै सूरज री उगाळी
रौ दरसाव
म्हारै रूं रूं में
खणकै लाळसा रा झरणा
हेटै हंसां री अेक
हेजल होळी उडांण भरै
अेकाअेक चांदणी री ज्यूं पाथरगी जळजौत
अनांव तळ-नगरी में
थमग्या रितुवां रा गेड़ा...
मिलण सारूं उमायौ असमांन
मच्छी सूं मनचीती
केळ करै
कबांण सूं छूट्यौ तीर
पांणी दो फांड़ां में फांटग्यौ
नै पळापळ मांय
पैठग्यौ तिरस्यौ तिराक
अबै नीं नै पार उतरण री।
चिन्त्या कोनी।
