वै
जिणां री खैर-खबर राखतां
हाडक्यां गाळो
न्याव री उम्मीदां ही उणां सूं
बरसूं-बरस ऊंचायां फिर्यो
वांरी इज्जत रो भार
वै इज भुगतावता फिरै
म्हारी मजबूरियां ने
धुडगी वै भीतां
छत जिण रै ऊपर ठवाई ही
दुख इण बात रौ उणां ने
के म्हारा पंख क्यूं खुलग्या
क्यूं छोड़ दी म्हैं
परकम्मा देणी उणां री।
सोचूं
किण करजै रै बदळै
आज तांई अडाण पड़ियौ हौ
मांनीजता मिनखा रै हाथां मांय
उणां री रम्मत सारूं
उपरांखर उडियौ जद आज
पिसतावौ नीं रैयौ
इण निरणै रौ
चैरा पिछांण लिया
औळख लियौ असली सरूप
जांण लियौ
के अंधारौ
केई मिनखां री जड़ां में जमियोड़ौ है
अर
सरतिया आंधा इज व्है
अंधारै सू जल्मियोड़ा विस्वास।
