जे तूं मिल ज्याय कणां, मनड़ै री बात करां
रुत री तो रमझोळां, निरखैला जीव तणां
कळियां नै काम घणां महक ढुळावण सूं
भंवरा बदनाम घणां हंस बतळावण सूं
आवो बा याद करां, थोड़ी कुचमाद करां
रुत री तो रमझोळां, निरखैला जीव तणां
जे तूं मिल ज्याय कणां।
गीत तो म्हारै बिना, और कई गाया
हिवड़ै री हाट तणां, और कई आया
आवो बोपार करां, दो सूं दो च्यार करां
रुत री तो रमझोळां, निरखैला जीव तणां
जे तूं मिल ज्याय कणां।
प्रीत री साख घट्यां, कागद कोरो है
मरवण आप नट्यां जीवण दोरो है
आवो तन ताप हरां, आवो मन धाप भरां
रुत री तो रमझोळां, निरखैला जीव तणां
जे तूं मिल ज्याय कणां।
