औ तळाव गैरौ,
आवौ
न्हावां इण में
खळखोटा लेवां
करां भरोसौ पांणी रौ
घांणी रौ बळद
जिंयां आंख्यां पर बांध कूंपला
चकरी देवै
आपां थोड़ी ताळ लगावां
गिरणांफेरी
निरमळ जळ में
छळ री जिण क्यार्यां में खिलियौ
फूल इलम रौ
वीं नै नागण लैरां रै माथै धर
च्यारूं मेर तिरावां
जे थक ज्यावां तौ गळबांथी घाल
कांम-काया नै सेवां
रूं-रूं में किरणां री आंच संवेट
लगावां डुबकी—
थाग तळी रौ लेवां
औ तळाव गैरौ
आवौ इण नै अपणायत देवां।
