लोगां रौ
माजनौ भांडतौ
सूरज ऊग्यौ
अर पाधरौ
अकास रै पगोतियां
चढग्यौ।
उण रै पांवडां में
रुळतौ रयौ देस
बादळां रा
लीरा-लीरा व्हैग्या।
सुण ओ स्याणां!
थारी चंतराई री कोथळी खोल
ग्यांन बखांण
अेक निजर देख
धूळ में धंसकता जावै
पुरखां री पाग रा
फूठरा निसांण!
दिन उजास री
आंगळियां चूंघतौ
सरू व्है
भांत-भांत रा
ठांव-ठिकाणां
बरतण-बासण
अणभेंट्या भाखर
फाट्यौड़ा बरताव
आकरी बातां
अणमणा तीज-तिंवार
होंठ पाथर्यौड़ा
माथै में मण-मण रा गूमड़ा
रूगतां में मैल
रगां में बिखर्यौड़ा
अणगिणत तूंमड़ा
अै’लकार उघाड़ौ
बमंडी मारै
खूंटी नै गाभा अर
गाभा नै खूंटी
पलक नीं धारै
सिंझ्या ढळतां
अम्बर टोकसी सो दीसै
दुकानां-दफतरां रै
बाड़ां सूं
नीसरै कळपता जीव
हाका करै बस-रिकसा
पलदार पाखती थूं कै
दांत पीसै
सुण ओ कालबेलिया!
थांरी कमाई री पोटळी खोल
सांपां नै खुल्ला छोड़
आंख्यां में सुरमै री ज्यूं
सार रातिन्दौ
आंतड़ियां नै धोक देय
सुपनां रा लूखा टुकड़ा तोड़।
