मन रो ऊजड़ अड़ावो
सुळझै तो, कियां सुळझै?
लावण लागै भरूंठ ज्यूं
गडतो ई जावै।
दरद रो ताप खरोलियै घाल्यां
गुमसुम-गुमसुम रैवूं
सूड़ काटै तो
कुण काटै..?
अणकाट्यो बधतो ही रैवै।
सूळ सा बेधै, तो
तो मैं रागळी छांटूं
रेवड़ चरातै गुवाळियै ज्यूं।
सपना काचा रैवै, जद ई टूं..टै!
नीम रा पाक्या पत्तां ज्यूं
डाळ्यां सैं छूटै!
कै
काचा घड़लां ज्यूं
पाणी घालतां ई फूटै!
पण बारै सूं सूखो-कांटकटीलो
मांय सैं रसवन्तो!
दरद अर मैं
अेक जीव जीवां
अेक चाल चालां
अेक रूप रैवां!
