बीस अेक बरसां री
नव परणेतण
बुहारतां बाखळ
जियां ही झांकियो खेत कानीं
धोरै सूं ढलतो दीठो
अेक आदमी
जिको आवै हो हांफतो
लांघतो सिणियां
भरतो डीघोड़ा डग
ज्यूं-ज्यूं बो मिनख
आवै हो नजीक
नेह रै नीर सूं
झरण लागी झरणै ज्यूं
उण कामेतण रै आंख री कोर
क्यूं कै अै तो उणरा ईज भरतार हा
जिका आया है घरै
दिसावर सूं
ज्यूं ही कनैं आयो कंत
लिपटगी लसकरियै सूं
भिज्योड़ै गालां
बाखळ रै बिचाळै
क्यूं कै उण टांणै
घरै नीं हो कोई और
करतां घण लाड
धण नैं बुचकारतां
बोलिया पीव
जा अै भोळी
गैली कठैई री
हूं तो आयो हूं अर थूं रोवै
करै है गैलायां टाबरां ज्यूं
टाबर नाम सुणतां ही
घरआळी सरमायगी
अर हंसण लागी रोवती-रोवती
टाबरां रै जियां ई
अर बोली!
आंपारै जद हुसी टाबर
पढाऊंली बांनै बीए तांई
लगाऊंली सरकारी नौकरी
अर बणावूंली अफसर
जावण नीं दूं म्हारै टाबरां नैं
थांरै जियां दूर दिसावर
सुणता गौरी री बातां
मंद-मंद मुळकै हो
बो भागी बाप
अर जचगी ही उणरै ही
कै उणरी औलाद करै
सरकारी नौकरी
बो जद ही आवतो घरै
सिधावतां पाछो
देवतो घरआळी नैं रिपिया
खुदरी मां सूं छानै
कदैई पचास
अर कदैई पूरा सौ
वा भावी मां
संचण लागी
गरभधारण सूं ई पैलां
वां सौ पचास रिपिया नैं
इण भाव सागै
कै आं रिपिया सूं भणाऊंली
म्हारै टाबरां नैं
अर लगाऊंली बांनै
राज री नौकरी
वा भावी मां
नीं खरचिया वां रिपियां नैं
खुद माथै
नीं बपराई कोई चीज
खुद सारू
वा तो करती बटुअै में भेळा
खुदरै वां टाबरां री पढ़ाई सारू
जिका नीं आया हाल
गरभ में ई
कल्पना रै भविस में ई
वा करण लागी संग्रै
ईणीज कारणै सिरै है
मां री ठौड़
विधाता सूं।
