म्हारी पीठ कागद नीं ही
जठै कोर्यो आंगळी सूं म्हारै लारै बैठ'र बीजौ नांव...
म्हारी पीठ, म्हारै हीयै री लारली भींत ही,
जिण सूं झीणी-झीणी आवाजां सूणीजती ही
थारै नांव कोरणै री हीयै तांई!
हो उण भींत मांय अेक पिछोकड़ो ई,
म्हैं घणा ई जतन कर्या
थनै पाछळ सूं आंगणै तांई लावण रा,
पण तू लारली भींत पर कोरती रैयी आखर
अंगार सरीखा,
जिका मांय ही आग ई आग अर
उछळता खीरा..!
चिरमिटिया लागता रैया अठी-उठी हर बखत, आखी उमर,
पीठ माथै खाज खुंणती म्हारी आंगळ्यां
अैन बिचाळै उपड़्योड़ी चाम तांई पूग ई नीं सकी कदैई!
म्हैं नीं हो थारी मुळक रो सबळो कारण,
थारै प्रेम रो साछात् लेखो-जोखो...
म्हैं तो हाजर हो सदा 'ब्लांइड पेपर' आळै दाईं
कोरै कागद ज्यूं साव कोरी म्हारी पीठ लींया,
ढोवतो अणचाया उण तीन आखरां रो भार आखी जूण,
म्हैं जागूं हूं बरसां सूं लींया कूंची हाथ मांय
थारै हिवडे़ रै नीलवरणी आभै रै कैनवास माथै चाउं कोरणो
म्हारै नांव रो तारो,
हुवै कठैई तो फगत अेक पळकतो तारो ''इमरोज तारो!
