अजे ताईं
फेरबदळ
अर
उखाड़पटक
री बळ-बळती लूवां चालै
भूसळींजती भावनावां रा
भतूळिया
अूजळै आवै रै
गायै नै मटमैलो राखै
चेतनां रै चौक मांय
फण-फैलायां फणधरां रो
फूंफकार
गळियां री मोड़ सूं
गांव ताईं सुणीजै
अकलवाळां री
अकल पूणीजै
अचंभो है
सांच नै आंच लागरैयी है
लूंटा-खोस माचरैयी है
आंख्यां मीच’र
अंधारो करणै सूं पैला
हियै मांय कांगसी फेरो
समै रै दरपण में
देखो चै’रो
जद ई मालूम पड़ैला
कै कुण है कैं’रो
समै अेक सो कोनी रैवै
समै रो पगफेरो।
