1
पोतै नै गोद लेवता ई
दादी रै फाटेड़ै बुगचै सूं
चाणचकै ई पड़ग्यो
ठीकरी होयोड़ो सबद
'त्या'!
2
डाडो राजी होयो म्हूं
जद भोत दिनां बाद
की बोर्ड मांय
छेकड़ लाध ई ग्यो
'ळ' !
3
णमोकार सुणताई
हरख बापरयो अंतस घट
चेतना जाग उठी
कद है खाली
आपणी वर्णमाला रो
'ण'!
4
बरसां सूं रूस्योड़ो खेत पाड़ौसी
करोनियै रै खुड़कै मांय
चाणचकै आय उभ्यो ढाणी
रामरमी करतो बोल्यो
काल, म्हारलै खेत मांय करस्यां
'ल्हास'!
5
मा रै दायजै री
संदूकड़ी फिरोळतां लाधी
पइसै टक्कै सूं बेस्सी चीज
'चिरमी!
6
ढेरियै कात्यै सूत सूं
बणयोड़ै मांचै नै
झोळी होंवतां देख
दादो रीसां बळता बोल्या
थारी कसणी पड़सी
'दावण'!
7
पैलपोत
कुण घड़या
हेला मारता सबद
जिका अजै तांई पाड़ै
ब्रह्मांड मांय
'बोकल्डा'!
