मूंडां रा सवाद सारू
गैस-चूल्हैं माथै
कणक-मोठ बाजरा-मीसी
सिकै रोटी।
चुपड़ी-चुपड़ी गोळ-मटोळ रोटी
साथै भांत-भांत रो साग।
झूंपड़ी में
चूल्है सूं निसरतो धूंवों
पतळी-मोटी सूखी रोटी
लूण मिरच री चटणी
टींडसी, सांगरी, काचरां रो साग
पिताण करावै खून-पसेव रो।
चूल्हां माथै
सिकती रोटी रा सवाद
न्यारा-न्यारा
सवाद में फरक इत्तो’ई
अेक चाब-चाब खावै रोटी
बीजो खेलै रोटी सूं
मखोळ उडावै रोटी रो।
अन्न बोल्यो-चूल्हो चेताओ
रोटी खाओ
रोटी सूं खेलो मत।
चूल्है माथै सिकती रोटी
आपरो सवाद राखै
सवाद सूं असर ज्यादा राखै
अणकूंत-अदीठ ताकत रोटी री।
