आंख्यां सूं
घुप्प अंधारै नै मसळूं
सोधूं हाथां सूं
अपणेस री टूटी-फूटी कोटड़यां
आंगळ्यां रा टरमोल्यां सू चूवै
अणसैंघो दरद
अतीत नै सूततो
म्हारै निसकारां में
उमड़-घुमड़े
सड़क, मकान अर
हर्या-हर्या खेत
वांरी आपरी पिछाण है...
पण म्हैं
वां सगळां सूं जुड़'र साव अेकलो हूं
आं माल अर मलीदां रो
खो'नास हुवैलो
गळपळ जावैला
गुमेज रा मोटा आखर
म्हारै पसीनै रै पळपळाट में
म्हारी चामड़ी री रगड़क सूं
पतंगा उठैला, नी थमैलो हिमाळो
म्हारै हाडकां री टक्कर सामैं
म्हनै खोद नाखण रो भरम
साव कूड़ो है
म्हारो रगत
लाल होतां थकां
जैर सूं कम नीं!
म्हारै मोस्योड़ा सपनां रै हाथ में
कुदाळी अर हथोड़ो है
चाकू अर छुरी नीं
म्हारी मुठ्यां में बीज है
अर आंख्यां में
सिरजण रो लैलाट है
म्हनै किणी बात रो अफसोस नीं
पण बस,
आज म्हारै रातिदो है।
