कुत्ता भूंसै है
मिंदर आळी गळी में
ऊंचलै गुंबद माथै कबूतरां रा कैई मोहल्ला
बींठ करै है रोज
पूजारी जी मिंदर रै मांय
चौथै टाबर रा बाप बणग्या,
लारलै दिनां ठाकरां रो छोरो पकड़ीज्यो हो
अेक हीण जात री छोरी सागै मिंदर मांय ही
मिंदर मांय स्सो कीं होवै है,
पण छोरी आळै मोहल्लै रा आदमी
नीं जा सकै मिंदर मांय
हीण जात री अेकली छोरी जा सकै?
म्हैं नीं जाणूं?
मिंदर मांय बैठ्यो ईश्वर पड़ूतर देण जोगो होवै तो पूछूं!
