मोहन की मुरली सूं मीठी
मनख्यां की मनवार।
म्हां नैं ऊं धरती सूं हेत
म्हां नैं ऊं धरती सूं प्यार।
पीळो पहर्यां बरसां सूं
बैरागण हळदीघाटी
मण मण मोतीड़ां माणक सूं
महंगी मूठी माटी।
हर की पैड़्यां पूज्यां हरकै
गंगाजी हरद्वार
माथै मोड़ बंध्या
नर-नारायण बदरी-केदार।
म्हां नैं ऊं धरती सूं प्यार।
चन्दरमा सूधो साधूड़ो
अर तारा जोगीड़ा
आतो जातो सूरज गावै
बरसां सूं पंछीड़ा।
अमरत सूं असनान करावै
जळ बादळ की धार
नाचै जीं की पोळ चांदणी
सज सोळा सणगार
म्हां नैं ऊं धरती सूं प्यार।
कश्मीरी केसर केरल का
काचा पाका गोळा।
मधुवन मैं मीठा सुर छेड़ै
पंछी भोळा भोळा।
म्हां नैं ऊं धरती सूं हेत
म्हा नैं ऊं धरती सूं प्यार।
बृन्दाबन की कुंज गळ्यां की
टचकार्यां पुचकार
बंसी बट, जमना तट, पणघट
नटखट मदन मुरार।
म्हां नैं ऊं धरती सूं प्यार।
जीं का पगल्या धोतां
मन मैं गरबै समदर राजो
ऊंचो मुकट हिंमाळा को
जाणैं मैड़ी को छाजो।
गंगा-जमना-सुरसत
नंद्यां नाळां को परवार
आड़ावळ विंध्याचळ डूंगर
ऊबा सीस उठा’र।
म्हांनै ऊं धरती सूं प्यार।
