मन बेताळ
चढ्यो चेतना रै कांधै माथै
बूझै अनगढ अंतरंगी सवाल
हे कलम रा विकरम!
देवो पडूतर
कै अै ठंठ्योड़ी हाडक्यां
खेतां मांई कांई बोवै
आ जापायत लुगाई
राजमारग री माटी क्यूं ढोवै
किलकारियां आंगणै री ठौड़
अकूरड़ी किण हाथां पूगै
स्हैर री सड़कां माथै
रगत कुण बहावै
बूढ़ो बरगद क्यूं उदास है
अर आं पीळी आंख्यां में किण री आस है?
आजादी री इमरत बरखा
हवेल्यां में क्यूं बरसी
अभरोसै री राख
संबंधां माथै कुण मसळी
बोल विकरम,
बता विकरम!
कै फौलाद सूं जद
हळ री फाळ बण सकती ही
तद दुनाळियां कुण घड़ी
मानखै नैं मानखै सूं डरण री जरूत क्यूं पड़ी
कारतूस रै खोळ रा दागीना
क्यूं नी बणाओ
टैंक सूं टाबरियां नै
स्कूल क्यूं नीं पूगाओ?
