फूलां मिस
कुण हसै?
पांखियां मिस कुण गावै है?
हसतो-गातो
कुण जीवण रो
राग सुणावै है?
पवनां रै मिस
भर’र गन्ध
आ किण री सांस चलै?
सूरज-चंदा
तारां रै मिस
किण घर दीप बळै?
आभै में रम
कुण सतरंगी
रंग बरसावै है?
फलां मिस
कुण हसै?
पांखियां मिस कुण गावै है?
कुण खीजै है
जेठ-महीनै
आसाढ़ां रीझै?
सावण-भादू
नेह-नोर
किणरी चादर भीजै?
कुण फागण में
मुळक माधुरी
रस भर जावै है?
फूलां मिस
कुण हसै?
पांखियां मिस कुण गावै है?
किणरो अलख
अरूप-रूप
मुधरो हंसतौ दीपै?
बळतै मन में
लेप चांनणी
कुण चन्नण लीपै?
रूप-रंग नैं
बदळ-बदळ
पल-पल कुण आवै है?
फूलां मिस
कुण हसै?
पांखियां मिस कुण गावै है!
