बस्ती-बस्ती जंगळ बैठ्या—
कुण नै व्यथा कैवां।
म्हैल हुया मिमिता रा खंडहर
प्यार गयो परदेस।
अपणूपण अस्तित्वहीन,
है असरहीन उपदेस।
आंगण में अेक सर्पिल बैठ्या—
कुण नै व्यथा कैवां।
पिता-पुत्र रो नातो
जियां मरणासन्न बिमार।
भाई-भैण नै बांध न पावै
अब राखी रा तार।
रिश्ता बण पग-पग छळ बैठ्या—
कुण नै व्यथा कैवां।
हर मिलबा-जुलबा रो केवल
स्वारथ है आधार।
दोस्त-दोस्त रै बीच खिंची है—
साजिस री दीवार।
सब तन-मन सूं घायल बैठ्या—
कुण नै व्यथा कैवां।
होळी में बी मन रो कीचड़
नहीं उळीचै लोग।
नुवां फरेबां सडयंत्रा रा
बिरवा सींचै लोग।
सभी द्वेष रै दल-दल बैठ्या—
कुण नै व्यथा कैवां।
