जठै ताईं
म्हारै रसातळ मांय जावण री बात है
तो आ तो म्हारी सदियां पुराणी ख्यात है।
म्हारो जूनै सूं जूनो इतिहास उठा’र देखल्यो
रसातळ मांय तो म्हे सदा ई जावता रैया हां।
म्हारै मानवी मोलां नै बेच-बेच खांवता रैया हां
कुटीजता पिटीजता रैया हां
मगरमच्छां सूं गिटीजता रैया हां।
बातां चालण जैड़ा सावचेत
तो म्हे कणाईं नईं हां
‘राम-कृष्ण’, जैड़ा लोग
म्हारै साथै फिर्या करता
जणा ई नईं हा।
रसातळ मांय तो म्हारो मूळ निवास है
हां,
बीं सूं बारै नीसरण री चेस्टा म्हारी सदा ई रैई
म्हारे मांय
है तो फकत
आ ईज बात खास है।
